2024 / 1 / 3
མཚན་མོ་ནི་ཕངས་པ་མེད་པའི་རྨི་ལམ་གྱི་ལོངས་སྤྱོད་དང་སྨྲ་བསམ་བརྗོད་མེད་ཀྱི་ཀློང་དུ་འབྱམས་པའི་དབྱངས་འགྲོས་ཤིག་རེད་དེ། དབྱངས་འགྲོས་ལ་དགུ་ཚིགས་དང་རྨི་ལམ་མཉམ་དུ་འཁོར།
མཚན་མོའི་ཕྱི་ནང་དུ་ལྷིང་འཇགས་ཁོ་ནས་རིགས་རྒྱུད་ཅིག་གི་གསང་བའི་རྨི་ལམ་དང་གཏམ་རྒྱུད་འཆད་ཅིང་བཟློ་ལ། རླུང་ཁར་བཟེད་པའི་སྟོན་ལོ་དག་རུམ་དུ་བཅུག་ནས་གཡའ་དག་པའི་སྟོན་མཚན་གྱི་ཟླ་འོད་དང་སྐར་ཚོགས་མཐོང་བར་རེ།
མཚན་མོ་རེ་རེ་ནི་སེམས་ཀྱི་རྩིག་ལྡེབས་སུ་མངོན་པའི་ཤོག་ལྷེ་རེ་རེ་དང་འདྲ་ལ། རྨི་ལམ་རེ་རེ་ནི་ཚོར་འདུ་གཞི་གཅིག་ཏུ་སྦྲེལ་བའི་སྙན་ངག་རེ་རེ་དང་མཚུངས།
ཤོག་བུ་ཆུང་ཆུང་ཞིག་གི་སྟེང་དུ་ཁྱེད་ཀྱིས་བྱིའུ་ཆུང་གི་གཤོག་པ་བརྐྱངས་ནས་འཇམ་ཞིང་མཉེན་པའི་དུངས་བརྩེ་ཡི་སྙན་ངག་ཅིག་བྲིས་པ་དེས། ཁྱེད་ཀྱི་མིག་འོད་ལ་ཁྲེལ་བག་ལྡན་པས། མི་རྣམས་ལ་ཡིད་དུ་འོང་བའི་བསིལ་རླུང་གི་སྒེའུ་ཁུང་ཞིག་ཕྱེས།
མི་ཚེའི་ལམ་ཁ་ནས་ཅི་ཡང་འབྱུང་སྲིད་དེ། ང་ཚོ་ཟང་ཟིང་གི་ལམ་ཁ་རེ་རེ་ནས་བྲལ་མ་ཐག་ཡང་རྒྱུས་མེད་ཀྱི་གནས་མལ་རེ་རེ་ལ་འབྱོར་ངེས་ཏེ། ཚེ་གང་བོར་ང་ཚོས་དེ་ལྟར་དུས་ཚོད་ཀྱི་རྗེས་བསྙེགས་ཤིང་འགྲུལ་བཞུད་ཀྱི་ལམ་བུ་ཡང་ཟློས་བསྐྱར་ཟློས་བྱེད་པ་ལ། དོན་དུ་མིའི་རིགས་ལ་བདེན་མཐའ་གསལ་བའི་དམིགས་ཡུལ་ཅིག་ཡོད་དམ།
རྨི་ལམ་ཡོད་ཚད་མཚན་མོའི་ཁམས་སུ་སྦྲུམ་ལ་མཚན་མོ་ཡོད་ཚད་རྨི་ལམ་ནང་དུ་འཁོར།
མཚན་མོ་དང་རྨི་ལམ་འབྲེལ་ཐབས་མེད་པ་བཞིན་རྒྱང་རིང་དང་ཐག་ཉེ་ནམ་ཡང་ང་ཚོའི་མིག་མདུན་དུ་གནས་ལ་རྐང་འོག་ཏུ་བདོག
ཞིབ་ཏུ་བསམ་ན། མཚན་མོ་ནི་སྐད་སྒྲ་མེད་པའི་མིག་ཆུ་ཞིག་ཡིན་ཡང་སྲིད་ལ། མིག་ཆུ་དེ་ལོ་རྒྱུས་ཀྱིས་ས་ཆེན་ལ་ཕུལ་བའི་དྲན་གདུང་གི་ཞུ་འཕྲིན་ཡིན་ཡང་ངེས།
མཚན་མོ་ནི་རབ་ཏུ་འབྱམས་པའི་ནམ་མཁའ་ཞིག་ཡིན་ན་རྨི་ལམ་ནི་དེའི་མཐོངས་པའི་དབྱིངས་སུ་ཟློས་གར་ཅི་དགར་བསྒྱུར་ཆོག་པའི་གཤོག་པ་ཆ་གཅིག་སྟེ། བྱིས་པ་ཚོ་རྨི་ལམ་ནང་ཨ་སྔོན་དབྱིངས་སུ་འཕུར་ནས་ནར་སོན་གྱིན་ཡོད་ལ། བགྲེས་པོ་དག་རྨི་ལམ་ནང་དག་པའི་ཞིང་དུ་བགྲོད་ཀྱིན་མཆིས། མདོར་ན། རྨི་ལམ་ནི་མཛེས་སྡུག་ཤིག་རེད་ལ་འཇིགས་སྐྲག་ཅིག་ཀྱང་ལགས།
མི་ཕོ་ཞིག་གི་ལོ་ངོ་མང་པོའི་འགྲུལ་བཞུད་ཀྱི་རྨི་ལམ་ལས་གསེར་མདོག་གི་མཆོད་རྐོང་ང་ཚོའི་སྙིང་ཁར་སྦར་ཅིང་མཆིས་ན། རྨི་ལམ་ཁྲོད་ནས་གཏན་དུ་ཡལ་བ་མེད་པའི་རྨི་ལམ་གཞན་ཞིག་ང་ཚོའི་སྲ་མཁྲེགས་ཀྱི་རུས་པའི་སྟེང་དུ་ཟུག
དེ་ལྟ་ན། ང་ཚོར་རྨི་ལམ་གཞན་ཅི་ཡང་མེད་དེ། ས་ཆེན་མཚན་མོ་ཡིན་ལ་མཐོ་སྒང་རྨི་ལམ་ཡིན་པའི་རྨི་ལམ་ཟུར་ཁ་ཅན་ཞིག་གིས་ནམ་རྒྱུན་སེམས་ཀྱི་སྐྱ་རེངས་བསུ་མ་ཐུབ་པ་ནི་ཡིད་ཀྱི་ན་ཟུག་ལགས་ན། འཆི་བདག་གི་མདུན་ནས་ཀྱང་མཚན་མོའི་གཤོག་པ་མཁའ་རུ་བརྐྱང་ངེས་པའི་རྨི་ལམ་ལ་ནམ་ཡང་ཡལ་བ་མེད་དོ།།
མཚན་མོ་ཨ། རྨི་ལམ་ཨ། ལོ་རྒྱུས་དང་རེ་སྒུག་གི་ནམ་གསལ་བར་གྱིས།