2024 / 1 / 10
རྒྱ་གར་གྱི་གློག་བརྙན་ལས་རིགས་དར་རྒྱས་འགྲོ་བར་ཕྱོགས་མང་པོའི་ཐད་ཀྱི་རྒྱུ་རྐྱེན་ཡོད། དང་ཐོག་རྒྱ་གར་སྲིད་གཞུང་དང་དམངས་ཁྲོད་སྒྲིག་གཞིས་རྒྱ་གར་གྱི་གློག་བརྙན་ཐོན་ལས་འཕེལ་རྒྱས་ལ་ལེགས་སྐྱེས་ཆེན་པོ་ཕུལ་ཡོད། དཔེར་ན།རྒྱ་གར་གྱི་གསར་འགྱུར་དང་རྒྱང་བསྒྲགས་པུའུ་ཡི་མངའ་འོག་ཏུ་རྒྱ་གར་གྱི་གློག་བརྙན་ལས་དོན་པུའུ་དང་།རྒྱ་གར་གྱི་གློག་བརྙན་བརྙན་འཕྲིན་སློབ་གླིང་།གློག་བརྙན་སྐུལ་སྤེལ་གཞུང་ལས་ཁང་སོགས་ལས་ཁུངས་དང་སྡེ་ཁག་བཙུགས་ཡོད།ལས་ཁུངས་འདི་དག་གིས་གློག་བརྙན་དང་བརྙན་འཕྲིན་གྱི་ཤེས་ལྡན་མི་སྣ་གསོ་སྐྱོང་དང་མངག་གཏོང་བྱེད་པར་འབད་བརྩོན་བྱས་ཏེ།གློག་བརྙན་ཐོན་ལས་ཀྱི་འཕེལ་རྒྱས་ལ་སྔར་བས་སྐུལ་འདེད་བཏང་ཡོད།
གཞན་ཡང་རྒྱ་གར་གྱི་གློག་བརྙན་ཐོན་ལས་ཀྱིས་རྒྱ་གར་རང་སའི་ལྷ་སྒྲུང་སྲོལ་རྒྱུན་དང་དེ་བཞིན་སྔར་ཡོད་ཀྱི་རོལ་རྩེད་རྣམ་པ་དང་མགྱོགས་མྱུར་ཟུང་འབྲེལ་བྱས་པས་ཁོང་ཚོའི་གློག་བརྙན་ལ་ལྷ་སྒྲུང་དང་།ཆོས་ལུགས།རོལ་དབྱངས།ཞབས་བྲོ་བཅས་ཚུད་ཡོད་པ་རེད། ལྷག་པར་དུ་དུས་རབས་20པའི་ལོ་རབས་30པར་སྐད་སྦྱར་ཡོད་པའི་གློག་བརྙན་གྱི་ལག་རྩལ་རྒྱ་གར་དུ་ཁྱབ་རྗེས་རྒྱ་གར་གྱི་གློག་བརྙན་ཐོན་ལས་ཀྱིས་མགྱོགས་མྱུར་གོམ་སྟབས་ཀྱི་རྗེས་ཟིན་ཐུབ་པ་བྱུང་ནས་དུས་ཚོད་ཐུང་ངུའི་ནང་ད་དུང་མ་སྨིན་པ་རྣམས་དོར་ནས་དེ་བས་གསོན་ཉམས་ལྡན་ལ་རོལ་དབྱངས་ཀྱི་ཡིད་དབང་འཕྲོག་ཤུགས་ཆེ་བའི་སྐད་སྦྱར་ཡོད་པའི་གློག་བརྙན་གྱི་ཕྱོགས་སུ་བསྒྱུར་ཡོད།
གཞན་ཡང་ཉེ་བའི་ལོ་ཤས་རིང་རྒྱ་གར་གྱི་གློག་བརྙན་གྱི་ལོ་རེའི་ཆ་སྙོམས་ཐོན་ཚད་1500ལས་བརྒལ་བ་དང་ཐོན་ཚད་མཐོ་པོ་དེ་རིགས་ཀྱིས་ཚད་གཞི་ངེས་ཅན་ཞིག་གི་ཐོག་ནས་རྒྱ་གར་གྱི་གློག་བརྙན་ལས་རིགས་འཕེལ་རྒྱས་འགྲོ་རྒྱུར་སྐུལ་མ་ཐེབས་ཡོད་པ་རེད། དེ་དང་ཆབས་ཅིག་རྒྱ་གར་གྱི་གློག་བརྙན་གྱི་གཏམ་རྒྱུད་རྒྱས་བཤད་དང་གོམ་སྟབས་ཚོད་འཛིན་སོགས་ཐད་ལའང་གཟེངས་སུ་ཐོན་པའི་ནུས་པ་ལྡན་ཡོད་པས་དེའི་བརྩམས་ཆོས་ལ་ཚབ་བྱེད་ཀྱི་བསམ་པ་དང་ཡིད་དབང་འཕྲོག་ཤུགས་ཆེན་པོ་ལྡན་ཡོད་པ་རེད། དེར་བརྟེན།རྒྱ་གར་གྱི་རྒྱལ་ནང་ཙམ་མ་ཟད།རྒྱ་གར་གྱི་གློག་བརྙན་ཕྱི་རྒྱལ་དང་ལྷག་པར་དུ་ཀྲུང་གོ་སོགས་ལའང་དགའ་བསུ་ཆེན་པོ་ཐོབ་ཡོད།