2024 / 1 / 2
མི་ཚེ་དང་དཔེ་ཀློག
རྨེ་རུ་ཡུལ་ལྷ་ཐར།
མི་ཚེ་ནི་འགྲུལ་བཞུད་རིང་མོ་ཞིག་ཡིན་པ་སུ་ལའང་གསལ་ཞིང་། འགྲུལ་བཞུད་དེ་ཁ་དོག་དཀར་དམར་སྔོ་ལྗང་གིས་གྲུབ་དགོས་པའང་ཀུན་གྱིས་ཤེས་མོད། སོ་སོའི་མོས་པ་དང་ཁྱད་ཆོས། ལས་རིགས། དབང་ཤེས། གཤིས་སྤྱོད་སོགས་མ་འདྲ་བའི་དབང་གིས། ཁ་དོག་དེ་དག་ཚུལ་ཅི་ལྟ་བུས་བསྒྱུར་བའི་ཐད་ལ་དྲན་ཚུལ་མི་གཅིག་ཅིང་། དེས་མི་ཚེའི་སྐྱ་ཐིག་རེ་རེ་ཚོན་མདོག་མི་གཅིག་པའི་རིས་ཀྱིས་གྲུབ་ཡོད་པ་རེད། དེ་ལ་ཚོན་མདོག་མི་མཚུངས་པའི་རི་མོ་རེ་རེར་རང་རང་གི་དོན་སྙིང་རེ་ནི་ལོས་ཡོད་མོད། ཧྲིལ་གྱིས་གཞལ་ན། མི་ཚེར་དཔེ་ཀློག་གི་ཚོན་རིས་བསྒོས་ཡོད་མེད་ཀྱིས་རི་མོ་དེ་དག་ལ་མདངས་ཐོན་ཡོད་མེད་གསལ་བོར་མཐོང་ཐུབ་བོ། །
སྔོན་མའི་ཡི་གེ་ཤེས་དགོས་མིན་གླེང་བའི་དུས་རབས་དེ་མཇུག་རྫོགས་ཤིང་། བར་གྱི་ཡི་གེ་ཇི་ལྟར་སློབ་པའི་དུས་རབས་དེའང་རིམ་གྱིས་ཡལ་བས། ད་ནི་ཤེས་ནས་ཇི་ལྟར་སྤྱོད་པའི་སྐོར་ལ་བསམ་དགོས་པའི་དུས་སུ་ཐོན་ཡོད་ལ། སྤྱད་ནས་རིན་ཐང་གང་ཞིག་མངོན་འགྱུར་བྱ་དགོས་པར་མནོ་དགོས་པའི་དུས་ལ་བསླེབས་ཡོད་པ་རེད། སོ་སོ་སྒེར་གྱི་གཡས་གཡོན་ལ་འཁྱུག་ཙམ་འཁོར་ཙམ་བལྟས་ན། དཔེ་ཀློག་བྱས་ཏེ་ཕྱུག་པོར་ཆགས་ཡོད་པ་ཉིན་མོའི་སྐར་མ་ཡིན་མོད། དཔེ་ཆ་བཀླགས་ཏེ་སྐྱིད་པོར་འཚོས་ཡོད་པ་ལག་གིས་གང་བདེར་བརྩི་རྒྱུ་ཡོད་པས། དཔེ་ཀློག་ནི་སྙན་དང་གྲགས་དང་ཐོབ་ལ་ཐད་ཀར་མ་འབྲེལ་མོད། ཕུལ་དང་རབ་དང་མཆོག་ཡིན་པ་གསལ་ལེར་མཐོང་ཐུབ་བོ། །
དཔེ་ཀློག་ནི་རྒྱན་ཆ་ཞིག་ཏུ་བལྟས་ན་འགྲིག་སྟེ། མི་ཚེའི་ཕྲེང་བར་ཚར་དུ་དངར་བའི་མུ་ཏིག་གི་དོག་པ་རེ་རེ་བསྟར་ཡོད་པ་དང་མཚུངས་སོ། །ཕྲེང་བའི་རྡོག་པོ་དེ་དག་རྡོ་རིགས་ཡིན་ན་ཆོག་ལ་ཤིང་རྡོག་ཡིན་ནའང་རུང་མོད། མུ་ཏིག་གི་མདངས་འཚེར་བའི་ཕྲེང་རྡོག་དེ་དག་གིས་རྒྱན་ཆའི་ཏོག་དང་ཕུལ་མཚོན་པ་ལས། ཡོད་པ་གཅིག་ལ་ཐུན་མིན་གྱི་ཁྱད་པར་མཚོན་པའོ། །དཔེ་ཀློག་ལ་གོང་སྨོས་ཁྱད་ཆོས་དང་ནུས་པ་ཡོད་ཅིང་། དེའང་བལྟས་ན་མི་མཐོང་ཞིང་རེག་ན་མི་ཐུག་པའི་སྨྲ་བསམ་བརྗོད་འདས་ཀྱི་རང་བཞིན་ཞིག་མངའ་བའི་རྐྱེན་གྱིས། སེམས་གཤིས་དྭངས་པའི་མི་རེ་གཉིས་ཤིག་དེ་ལ་མོས་ཤིང་འཁྱུད་འགྲོ་བ་མ་གཏོགས། མང་པོ་དག་ཁ་མཐུན་པར་དཔེ་ཀློག་དང་རྒྱང་དུ་བཀྱེད་འགྲོའོ། །
དཔེ་ཀློག་ལ་རིགས་མི་འདྲ་བ་དུ་མ་ཡོད་པ་ལས། ཞིབ་ཀློག་དང་བམ་ཀློག དཔྱད་ཀློག་དང་འགྲེལ་ཀློག ཚང་ཀློག་དང་དུམ་ཀློག བསྡུར་ཀློག་དང་བཀྲོལ་ཀློག ཁྲིད་ཀློག་དང་སྐྱོར་ཀློག་ལྟ་བུ་ཕལ་ཆེར་གྱིས་སྤྱོད་ཅིང་། གོམས་གཤིས་དང་མོས་པ། དགོས་འདུན་དང་ལས་བྱར་དམིགས་ནས། དཔེ་ཀློག་གི་ཐབས་ཤེས་མི་འདྲ་བ་སྤྱོད་པ་རེད། ཡིན་ཡང་ཤེས་དགོས་པ་ཞིག་ལ། ནམ་ཞར་དཔེ་ཀློག་རིགས་གཅིག་སྤྱོད་པ་མི་འོས་ཤིང་ཐབས་ཚུལ་མང་པོ་དཔེ་དེབ་ཡོད་ཚད་ལ་མཉམ་སྤྱོད་བྱེད་པར་ཡང་འཛེམ་དགོས་སོ། །
དེང་སང་སིལ་བུའི་དཔེ་ཀློག་དང་དྲ་ཐོག་དཔེ་ཀློག ཁ་པར་དཔེ་ཀློག་དང་མཉན་བྱའི་དཔེ་ཀློག་ལྟ་བུ་ཆེར་དར་ཞིང་། ན་གཞོན་རྣམས་གློག་རྡུལ་གྱི་གཏིང་ལ་འབྱམས་པའི་དཔེ་ཀློག་ཅིག་ལ་རང་བཞིན་ངང་གོམས་པར་བྱེད་མོད། དཔེ་དེབ་ལ་གཟུགས་དང་སྒྲ། དྲི་དང་རོ། རེག་བྱ་སོགས་མྱངས་ན་ཚོར་འོངས་པའི་ནུས་པ་བླ་མེད་ཅིག་ཡོད་པའི་སྟེང་། སེམས་ཀྱི་མཛེས་པ་རྗེན་པར་འབུད་ཅིང་ནང་གི་དེ་ཉིད་ལྷོད་ལ་འཇོག་པའི་བབ་ཆགས་པའི་རང་བྱུང་ནུས་པ་ལྷན་ནེར་མཆིས་པས་ན། ཤོག་བུའི་དེབ་ལ་བལྟ་བ་ལས་ལྷག་པའི་ཚོར་བ་ནི་རྙེད་དུ་མེད་དོ། །
དཔེ་ཀློག་བྱེད་པ་ལ་དཔེ་ཀློག་གི་གོམས་གཤིས་བཟང་བོ་ཞིག་ཆགས་པར་བྱ་རྒྱུ་གལ་ཆེ་ཞིང་། དེའང་གོམས་གཤིས་སྐྱེད་སྲིང་བྱེད་པར། རྒྱུན་ཡོད་ཅིང་དཔེ་ཀློག་ལ་མོས་གུས་བྱེད་པ་ནས་རྩོམ་དགོས་སོ། །དེ་བཞིན་གོམས་གཤིས་འདི་ཐོག་མའི་སྐབས་ལ་རང་གཅུན་རང་སྡོམ་ཅན་ཞིག་ཡིན་དགོས་ཤིང་བཙན་ཚུགས་ཙམ་གྱིས་ཡོང་དགོས་ལ། ཚེ་གང་སློབ་སྦྱོང་བྱེད་པའི་འདུ་ཤེས་བརྟན་པོ་དེས་སྐུལ་མ་བྱེད་དགོས། ཡིན་ནའང་ལས་རིགས་ཀྱི་ཁྱད་པར་དང་འབྲེལ་འདྲིས་ཀྱི་ཁོར་ཡུག་མ་འདྲ་བ་ལས། གོམས་གཤིས་དེ་འཇགས་ཐུབ་མིན་ལ་ཁྱད་ཡོད་དོ། །དེ་བས། རང་གི་འབྲེལ་འདྲིས་བབ་ཆགས་ཅན་དུ་བྱས་ཏེ་གྲོགས་བཟང་པོ་ཡག་གཤིས་ཅན་ལ་འགྲོགས་རྒྱུ་གཙོ་ཆེ་ལ། དཔེ་ཀློག་དེ་འབྱུང་སྤུས་མཐོར་འདེགས་ངོས་ནས་བསམ་རྒྱུ་ལྷག་ཏུ་གལ་ཆེ། དེ་འདྲ་མ་ཡིན་པར་སློབ་མས་བསླབ་དེབ་དང་ཟུར་ལྟའི་སྦྱང་དེབ་ཁོ་ན་བཀླགས། ལས་རིགས་གཉེར་མཁན་གྱིས་ལས་ཆོད་མཐོར་འདེགས་ཁོ་ནའི་དེབ་བཀླགས་ཚེ། ཚང་མ་འཕྲུལ་འཁོར་རྐྱང་དུ་གྱུར་བ་ལས་བསམ་གཞིག་ཡོད་པའི་མཐོ་རིམ་སྲོག་ཆགས་ལ་འགྱུར་ཐབས་མེད་དོ། །
སྤྱིར་བཏང་དཔེ་ཀློག་ནི་སོ་སོ་སྒེར་ལ་འབྲེལ་བ་ཞིག་ཡིན་པའི་ཆ་ནས། ཐུན་མོང་གཅིག་གྱུར་གྱི་ཐབས་ཤེས་ཤིག་བརྗོད་དུ་མེད་མོད། རང་ངོས་སྒེར་བའི་མྱོང་བ་ལས་དཔྱད་ན། ཐོག་མར་རང་གི་གཤིས་ལ་འཚམ་པའི་དཔེ་ཀློག་གི་སྲོལ་ཆགས་རྒྱུ་གལ་ཆེ་ཞིང་། དེབ་གང་ཡིན་ཡང་ཚང་བར་ཀློག་རྒྱུ་སྙིང་ལ་ཉར་དགོས་ཏེ། དེབ་ཁ་ཚང་དང་འབྲེལ་ཡོད་ནང་དོན་ཁ་ཚང་གིས་མུ་འབྲེལ་དཔེ་ཀློག་བྱ་དགོས་སོ།། དོན་དངོས་སྟེང་། ཤེས་བྱ་རིགས་གཅིག་ཅུང་ཟད་ཁ་ཚང་བར་རྟོགས་པ་ལ། དུས་ཡུན་རིང་བོའི་ཐད་ཀར་དང་འབྲེལ་ཡོད་ཀྱི་རྒྱུ་ཆའི་དཔེ་ཀློག་མེད་ན་ཡོང་ཐབས་མེད་པས་སོ། ། དེ་བཞིན་དཔེ་ཀློག་དེ་ཁ་གསབ་རང་བཞིན་གྱི་དཔེ་ཀློག་སྟེ་གང་ཆད་ན་དེ་ཀློག་དགོས་པ་དང་། གང་ཞན་ན་དེའི་ཐད་ནས་ཤུགས་རྒྱག་དགོས་པའང་ཆོས་ཉིད་དོ། །
མི་ཚེའི་གོ་རིམ་ལས་དཔག་ན། ཐོག་མའི་སྐབས་ལ་འདབ་ལག་རྒྱས་བྱེད་ཀྱི་དེབ་སྟེ་རྨང་གཞི་འཇོག་པའི་དེབ་བཀླག་དགོས་པ་དང་། བར་དུ་བློ་སྒོ་འབྱེད་བྱེད་ཀྱི་དེབ་སྟེ་གནད་དོན་གསར་བ་འདོན་ཞིང་དོགས་སློང་གིས་ཕྱུག་པའི་དེབ་བཀླག་དགོས་ལ། མཇུག་ཏུ་ཆེད་ལས་གཉེར་བྱེད་ཀྱི་དེབ་སྟེ་རང་གི་ལས་ཆོད་གཏིང་ཟབ་ཏུ་སྤེལ་ཞིང་འབྱུང་སྤུས་ཚད་མཐོར་སྤེལ་བྱེད་ཀྱི་དེབ་རྣམས་བཀླག་དགོས་སོ། །
དེར་བརྟེན། དཔེ་ཀློག་ནི་མི་ཚེ་དོན་ཡོད་དང་མདངས་ལྡན་དུ་གཉེར་བྱེད་ལམ་མཆོག་དེ་ཡིན་ཞིང་། ལམ་མཆོག་འདི་ཉིད་ཚུལ་ཅི་འདྲ་བས་འདེད་ཅིང་བཤང་རྒྱུ་ནི། འཁོར་བའི་ལམ་རིང་ཁྲོད་ཀྱི་མགྲོན་པོ་རེ་རེའི་གདམ་གསེས་ཏེ། མ་མཐའ་ཡང་གདམ་གསེས་འདི་ཀོ་གཏན་ནས་ནོར་མི་རུང་བ་ཞིག་གོ །